ئەمینداری گشتیی میلیشیای حزبوڵڵای لوبنانی شەڕێکی گەورەی لە دژی ئەمریکا و ئیسرائیل راگەیاند،بە رابەرایەتیی رێبەری باڵای کۆماری ئیسلامیی ئیران.

میدیای حزبوڵڵا بەشێکی وتارێکی حەسەن نەسروڵڵای ئەمینداری گشتیی میلیشیاکەی بڵاو کردووەتەوە، کە تێیدا ئاماژە بەوە دەکات، "ئەمریکا و ئیسرائیل هەوڵ دەدەن گوشار بخەنە سەریان، بەڵام ئێمە نە بە گەمارۆ، نە بە سزا، نە بە برسیەتی و نە بە هەژاری ئیرادەمان ناشکێت".

حەسەن نەسروڵڵا، "شەڕێکی گەورە“ی لە دژی ئەمریکا و ئیسرائیل راگەیاندووە و گووتویەتی، ”ئەمریکا و ئیسرائیل دەیانەوێ گەمارۆی بەرەکەمان بدەن".

ئەمینداری گشتیی حزبوڵڵا راشیگەیاندووە، "کە بەرەی ئەوان لە دژی ئەمریکا و ئیسرائیل لەلایەن ئایەتوڵڵا عەلی خامنەیی، رێبەری باڵای ئیسلامی ئێران رێبەرایەتی دەکرێ".

حزبوڵڵای لوبنانی، کە خاوەن میلیشیایەکی چەکدارییە، نوێنەرایەتیی پێکهاتەی شیعە مەزهەبی لوبنان دەکات و حەسەن نەسروڵڵای ئەمینداری ئەو حزبەش بەردەوام رایدەگەیەنێت، کە کۆماری ئیسلامیی ئێران چەک و پارەی حزبەکەی دابین دەکات.