Alternate Text

زۆرترین بینراو

Alternate Text

عەبدولستار مەجید: کاک مەسعود وتی پارتی شتێکی وایکردووە کە کۆمەڵی ئیسلامی وا توڕە بکات

کوردستان

بینراو 2022

13/09/2019

Alternate Text
+ -

عه‌بدولستار مه‌جید سه‌رۆكی فراكسیۆنی كۆمه‌ڵی ئیسلامی، هاوكات ئه‌ندامی مه‌كته‌بی سیاسی ئه‌و حیزبه‌ له‌وتووێژێكی لەگەڵ دەنگی ئەمەریکادا باس له‌قۆناغی نوێی په‌یوه‌ندییه‌كانی كۆمه‌ڵی ئیسلامی له‌گه‌ڵ پارتی دیموكراتی كوردستان ده‌كات.

لەسەرەتای قسەکانیدا عەبدولستار مەجید باسی لەسەردانەکەی وەفدی کۆمەڵی ئیسلامی بەسەرۆکایەتی (عەلی باپیر) ئەمیری کۆمەڵی ئیسلامی کرد بۆ لای (مەسعود بارزانی) و رایگەیاند، "سەردانەکە لەچوارچێوەی بڕیاری مەکتەبی سیاسی و سەرکردایەتی کۆمه‌ڵ بووە کە لەدوای ٣٠/٩ ئێمە پێمان وابوە دۆخی کوردستان چۆتە دۆخێکی جیاوازەوە، پێمان وابووە دەبێت پەیوەندییەکانمان ئاسایی بکەینەوە لەگەڵ ئەو لایەنانەی کە پەیوەندییەکانمان نا ئاسایین یا باش نین، وەلەگەڵ پارتیشدا پەیوەندییەکانمان بەدۆخێکی سارددا تێپەڕیووە، وە لەڕابردوودا ئەوانیش هەندێک دەسپێشخەرییان کردووە، ئەوەش هەر لەو چوارچێوەیە بووە".

هه‌روه‌ها ئاماژەی بەوشکردووە، "سەردانە بەسەرەتایەک بۆ دروستکردنەوە و ئاساییکردنەوەی پەیوەندییەکانمان دەبینین ئەنجامەکانیش لەمەودا دەبینین کەهەردولا رێک و کۆک بوین لەسەر ئەوەی ئەو قۆناغە تێپەڕی کەپه‌یوەندییەکانمان ساردبوو لەبەر هەر هۆکارێک بێت بەڵام قۆناغی ئایندەمان هەردوولامان بەباشمان زانی کە پەیوەندییەکانمان باش بێت."

ئه‌ندامەکەی مه‌كته‌بی سیاسی باسی لەوەشکردووە، "عەلی باپیر ئەمیری کۆمەڵی ئیسلامی لەسەردانەکەیدا بە مەسعود بارزانی راگەیاندووە، ئێمە ئەگەر رەخنەیەکمان گرتبێت بەتوند زانرابێت ئەوا هەر لەدڵسۆزیمان بووە بۆ هەرێمی کوردستان، ئه‌و قۆناغه‌ تێپه‌ڕی قسه‌ و لێدوانی توند به‌رامبه‌ر یه‌ك بڵێین ".

عەبدولستار مه‌جید جەختیکردووەتەوە، "ئەوەی گرنگە ئەوەیە کە ئێمە ئەوەمان رونکردۆتەوە کە ئێمە ئۆپۆزسیۆنی حیزب و ئه‌و فراکسیۆنانەش نین کە بەشدارن لەحکومەت و حکومەتیان پێکهێناوە نین، ئێمە ئۆپۆزسیۆنی حکومەتین، بۆیە ئێمە بەپێی عورفی دەولی دەکرێت هەندێک لەحیزبەکان لە حکومەت بن وە هەندێکیشیان ئۆپۆزسیۆن بن، بەڵام دەکرێت فراکسیۆنەکان باشترین پەیوەندییان هەبێت بۆ بەرژەوەندی گشتی."

ئەندامەکەی مەکتەبی سیاسی کۆمەڵی ئیسلامی راشیگەیاندووە، "کۆبونەوەکەیان لەگەڵ پارتیدا ئیجابی بووە و رونیکردەوە، ئیجابی بونەکە ئەوەبوو، یەکەم دیارە، باسی ئەو قۆناغەی رابردوو کرا کە جۆرێک لە ساردی هەبوو لەنێوان هەردولامان وە جارجاریش ڕەنگە قسەو لێدوانی توند بەرامبەر یەک وترابێت ئەوە باسکرا کە لەلای هەردولاوە ئەوە کۆتایی پێهێنراوە وە ئەوە قۆناغێک بوو تێپەڕی، وە "جەنابی مامۆستا عەلی باپیر" ئەوەی رونکردەوە کە ئێمە ئەگەر رەخنەیەکمان گرتبێت بەتوند زانرابێت ئەوا هەر لەدڵسۆزیمان بووە بۆ هەرێمی کوردستان، کاک مەسعودیش باسی ئەوەی کرد، کە وتومانە بۆچی کۆمەڵی ئیسلامی وا نیگەرانە؟ ئایا مەکتەبی سیاسی پارتی شتێکی وایکردووە کە کۆمەڵی ئیسلامی وا توڕە بکات و لێدوان و خیتابیان بەرامبەر ئێـمە واتوند بێت، ئێمە ئومێد دەکەین دوای ئەم دیدارە پەیوەندییەکان بەرەو باشی بڕۆن."

هەروەها ئەوەشی خستۆتە روو، "پەیوەندیمان لەگەڵ فراکسیۆنی پارتی پەیوەندییەکی ئاساییە، بە فراکسیۆنی پارتی و گۆڕان و یەکێتیشمان وتووە ئێمە ئۆپۆزسیۆنی حکومەتین نەک هی فراکسیۆن فراکسیۆنی پارتی سەردانیشی کردوین ئێمەش سەردانیان دەکەین."

پێش پێکهێنانی حکومەتی هەرێمی کوردستان بەرپرسانی کۆمەڵی ئیسلامی رایدەگەیاند، "کە چاوەڕوانی سەردانی شاندی پارتیە تا بەرچاوییان رون بێت ئایا بەشداری حکومەت دەکەن یا نایکەن؟ بەڵام شاندی پارتی سەردانی کۆمەڵی نەکرد و حکومەت پێکهات، لەوەڵامی ئەو پرسیارەی ئایا لەو کۆبونەوەیە باسی هۆکاری سەردانی نەکردنی شاندی پارتی-تان لە پارتی پرسی؟

سەبارەت بە ئەو پرسیارەی ئایا لەو کۆبونەوەیە باسی هۆکاری سەردانی نەکردنی شاندی پارتی-تان  پێش پێکهێنانی حکومەتی هەرێمی کوردستان لە پارتی پرسی؟عەبدولستار مەجید لە وەڵامدا وتویەتی، " نەخێر بەهیچ جۆرێک باسی ئەو بابەتە نەکرا، ئەو بابەتە تێپەڕی و کۆتایی پێهاتووە."

لە کۆتایشداعەبدولستار مه‌جید رەتیشیکردەوە لەکۆبونەوەکەیاندا باسی مەرجەعی کوردستان یا پێکهێنانی ئەنجومەنی باڵای پارتە سیاسیەکان کرابێت، ڕاشیگه‌یاند" نە لەکۆبونەوەکە نەدوای کۆبونەوە، نە پێش کۆبونەوە بەهیچ جۆرێک باسی ئەو بابەتە نەکراوە تا ئێمەش لەسەرکردایەتی کۆمەڵی ئیسلامی تاوتوێی بکەین و ڕای خۆمان بڵێین..

Copyright 2019 BMC TV. All right reserved

Designed and Developed by AVESTA GROUP