کەشناسێکی عێراقی رایدەگەیەنێت، سبەینێ پلەكانی گەرما بەرز دەبنەوە و لە هەفتەی داهاتوشدا شەپۆلێكی بارانبارین روو لە عیراق دەکات.

واسق سەلامی پسپۆڕی كەشناسی لە عێراق، لەتۆڕی کۆمەڵایەتی فەیسبوک لەهەژماری تایبەتی خۆی بڵاویكردووەتەوە، "سبەینێ (هەینی) پلەكانی گەرما بەرزدەبنەوە و هەوریش بە درێژایی رۆژانی هەفتەی داهاتوو بە ئاسمانی عێراقەوە دەبینرێت".

هەروەها پێشبینیشی كردووە، "لە رۆژی دووشەممەوە ناوچەكانی باشوری عیراق بارانبارین بەخۆیانەوە ببینن و بایەكی بەهێزیش سەرجەم شارەكان بگرێتەوە".

واسق سەلامی ئاماژەی بەوەشکردووە، "هەروەك لە رۆژانی چوارشەممە و پێنجشەممەش شەپۆلێكی باران بارین روو لە تەواوی عیراق دەكات و پێشبینی دەكرێت بۆ چەند رۆژێك بەردەوام بێت".

ئەو کەشناسەی عێراقیش رونیکردووەتەوە، "لەوەش زیاتر لە سەرەتای مانگی داهاتودا پلەكانی گەرما نزمبونەوە بە خۆیانەوە دەبینن و پێشبینی دەكرێت بەفربارین لە هەرێمی كوردستان دەستپێبكات".