خۆپیشاندانەکانی دوێنێی عێراق بووە هۆی دروستبوونی توندوتیژی لەنیوان هێزە ئەمنییەکان و خۆپیشاندەراندا، بەهۆی ئەو ئاڵۆزییانەشەوە ژمارەیەک کوژراو و برینداری لێکەوتەوە، بڕیاردرا له‌ پارێزگاكانی موسه‌ننا و زیقاریش ئه‌مڕۆ و سبه‌ینێ بکەرێتە به‌ پشووی فه‌رمی.

لەبەردەوامی خۆپیشاندانەکانی عێراق لە شاری بەغداو شارەکانی دیکە، له‌ پایته‌خت به‌هۆی توندوتیژییه‌كانه‌وه‌ باس له‌ كوژرانی خۆپیشانده‌رێك و برینداربونی زیاتر له‌ ٢٠ كه‌سی دیكه‌ ده‌كرێت، ئه‌مه‌ جگه‌ له‌ قوربانییه‌كانی سێ ته‌قینه‌وه‌كه‌ی شه‌وی رابردوو.

له‌ كه‌ربه‌لاش گرژییه‌كان بووه‌ هۆی كوژرانی خۆپیشانده‌رێك و برینداربوونی ژماره‌یه‌كی دیكه‌.

به‌وته‌ی سه‌رچاوه‌ ئه‌منییه‌كانیش له‌ پارێزگای موسه‌ننا، ٨٠ ئه‌ندامی هێزه‌كانیان له‌لایه‌ن خۆپیشانده‌رانه‌وه‌ برینداركراون، دواتر پارێزگار ناچاربوه‌ ده‌وامی فه‌رمیی له‌ پارێزگاكه‌ بۆ ئه‌مڕۆ و سبه‌ینێ رابگرێت تا رێبگرن له‌ هه‌ڵكوتانه‌سه‌ر دامه‌زراوه‌ فه‌رمییه‌كان و ئاسایشی هاووڵاتیانیش بپارێزرێت.

له‌ زیقاریش به‌هه‌مانشێوه‌ توندوتیژییه‌كان گه‌یشتنه‌ ئاستێك، كه‌ پارێزگار ناچاربێت دوو رۆژ راگرتنی ده‌وامی فه‌رمی رابگه‌یه‌نێت.

له‌ بابل-یش خۆپیشانده‌ران ویستویانه‌ بچنه‌ ناو بینای هێزه‌كانی به‌ره‌نگاربونه‌وه‌ی توندوتیژی و بیناكه‌یان گه‌مارۆداوه‌، داوای ئازادكردنی خۆپیشانده‌ره‌ ده‌ستگیركراوه‌كانیان كردوه‌.

له‌ نه‌جه‌فیش هێزه‌ ئه‌منییه‌كان ویستویانه‌ خۆپیشاندانێكی ده‌ره‌وه‌ی مه‌یدانی مانگرتنه‌كانی ئه‌و شاره‌ بڵاوه‌پێبكه‌ن و به‌هۆیه‌وه‌ پێنج خۆپیشانده‌ر برینداربون، هێزه‌ ئه‌منییه‌كانیش رێگا سه‌ره‌كییه‌كانی چون و هاتنیان بۆ نه‌جه‌ف داخستوه‌ و نه‌یانهێشتوه‌ كه‌س له‌ ده‌ره‌وه‌ی نه‌جه‌فه‌وه‌ بچێته‌ ئه‌و شاره‌.